LAOAG CITY – Kalikagom ti Department of the Interior and Local Government (DILG) nga amin a pulis ket masapol nga ammo da ti agmaneho ti lugan ken motorsiklo.
Segun ken ni DILG Secretary Jonvic Remulla, kagudua laeng ti agarop 220,000 a kameng ti Philippine National Police (PNP) ti ammo na ti agmaneho.
Kuna na a nakigtot kalpasan a naamoan na a saan nga amin a pulis iti pagilian ket ammona ti agmaneho.
Inrakurak daytoy ni Remulla kalpasan ti turnover ti 20 a motorsiklo iti Camp Delgado.
Inpetteng na a saan a naan-anay a makapagserbi iti Unified 911 emergency response no saan a dagus a makapagresponde dagiti pulis gapu ta saan da nga ammo ti agmaneho uray adda ti nakasagana a lugan.
Gapu iti daytoy, mangiparuk-at ti DILG ti memorandum a mangibilin kadagiti baro nga aplikante iti PNP a mangrugi iti sumaruno a tawen ket masapol nga ammo da ti agmaneho ti four-wheeled ken two-wheeled vehicles.
