LAOAG CITY – Inrakurak ni Ms. Chariz Garma, mangidadaulo ti Department of the Interior and Local Government ditoy siudad ti Laoag a kitkitaen ti lokal a gobierno ti pagsayaatan ti amin kangrunaanna no kasano a protehiran dagiti ubbing kadagiti dakes nga aramid.
Inbatadna a babaen iti Local Council for Protection of Children ket matratar ditoy dagiti addang a mabalin a makatulong kadagitoy.
Kunana a ditoy pay a mapagsasaritaan no kasano a maiyadayo dagiti ubbing iti aniaman a disgrasia kas kadagiti agkulimbitin kadagiti lugan ken dadduma pay.
Inlawlawagna nga adda metten ti umuna a panagsasaritada kadagitoy tapno adda pay maiyimplimentar ken maammoan ti publiko dagitoy a banag.
Inpanamnama ni Garma a babaen iti panagkikinnammayet dagiti dadduma pay nga ahensia ket ad-adda a makita dagiti pagsayaatan ken karbengan dagiti ubbing wenno agtutubo ditoy siudad ti Laoag.
