LAOAG CITY – Ad-adda pay a mainspirar dagiti nagduduma a barangay ditoy probinsya no maipaayan da ti insentibo tunggal adda ti maawat da a pammadayaw manipod iti provincial, regional ken national level.
Daytoy ti inbatad ni Atty. Gerard Gallardo, ti mangidadaulo iti Department of the Interior and Local Government ditoy probinsya.
Immunan nga inlungalong ni Gallardo iti Sang Panlalawigan iti pannakaipasa da ti resolusyon para iti pannakaipaay ti insentibo kadagiti barangay a makaawat ti pammadayaw wenno mangabak iti aniaman a pasalip.
Kuna na a babaen iti daytoy ket ad-adda pay a papintasen dagiti nagduduma a barangay ti serbisyo da para kadagiti masakupan da a lugar.
Maipalagip nga ado metten dagiti barangay manipod iti nagduduma nga ili ditoy probinsya ti nakaawat ti pammadayaw iti kallabes.
