LAOAG CITY – Mamati ti Department of the Interior and Local Government (DILG) nga awan ti peggad iti seguridad ti government contractor a ni Sarah Discaya iti baet ti agtultuloy nga imbestigasyon mainaig iti maanomaliya a flood control projects.
Daytoy ket kalpasan nga inrakurak ni Discaya ti pannakaalarma na para iti seguridad na isut gapuna a nagdesisyon a maipasidong iti National Bureau of Investigation (NBI) ken naglikudan na a simmuko daytoy.
Inlawlawag met ti abogado na a maysa nga strategic legal move ti nagbalin nga addang ti kliyente na ken saan a panangadmitir iti aniaman a nagbasolan na.
Segun ken ni Interior Secretary Jonvic Remulla, nakasarita na ni Department of Justice Acting Secretary Frederrick Vida mainaig iti kaso ni Discaya ken saan a mamati nga adda ti peggad para kenkuana.
Nupay kasta, kunana a dakkel a banag ti isusuko ni Discaya ken mabalin nga ikonsiderar ti korte ti kaso na ngem ti linteg ti masurot.
Iti agdama, sumangsango ni Discaya karaman ti 9 a sabsabali pay kadagiti kaso a malversation of public funds ken maipagarop a panaglabsing ti Anti-Graft and Corrupt Practices Act nga adda ti pakainaigan ti P96.5-million ghost flood control project iti Barangay Culaman iti ili ti Jose Abad Santos iti Davao Occidental.
