LAOAG CITY – Mangbukel ti Department of the Interior and Local Government (DILG) ti Quick Reaction Forces kadagiti rehiyon ken ciudad iti pagilian tapno masigurado ti dagus a pannakasolbar iti security concerns dagiti pagadalan.
Daytoy ket kalpasan ti panagado pay dagiti pagadalan a makaaw-awat ti pangta.
Segun ken ni Department of the Interior and Local Government Interior Secretary Jonvic Remulla, agar-aramid ti idaulwan na nga ahensya ken ti Philippine National Police (PNP) ti sistema a mangipaay ti gundaway kadagiti otoridad tapno masolbar da dagiti pangta ken dadduma pay nga emergency kadagiti pagadalan.
Iti agdama, dagiti pribado a pagadalan ket obligado a mangisayangkat ti bag inspections iti babaen ti security personnel da kabayatan ti panangpatalinaed ti nailian a pulisya ti presensya da iti ruwar dagiti pampubliko a pagadalan.
Madutukan met dagiti barangay tanud iti uneg ti pampubliko a pagadalan iti pananginspeksyon ti bag dagiti estudyante a sumsumrek iti campus.
Innayon ni Remulla a ti plano a quick reaction forces ket paset ti nalawlawa a gagem ti gobierno a liklikan dagiti kinadasak kadagiti pagadalan.
