LAOAG CITY – Nagballaag ti Department of the Interior and Local Government (DILG) iti publiko kontra iti sumagmamano nga indibidwal a maipagarop nga agpampammarang a ni Secretary Juanito ‘Jonvic’ Remulla tapno agkiddaw ti kontribusyon para iti sumagmamano nga organisasyon.
Mismo a ni Remulla ti nanggutigot iti publiko a saan nga i-entertain daytoy ket dagus nga ireport no makaawat da ti nasao a solicitation para iti kidkiddawen dagiti maseknan a pondo.
Immunan a nagballaag ni Remulla kadagiti kameng ti Department of the Interior and Local Government a saan nga umawat ti regalo kas panangsurot ti no-gift policy para kadagiti empleyado ken opisyal ti gobyerno.
Inbalakad ni Remulla a no adda ti maipatulod a regalo iti Department of the Interior and Local Government ket isubli a nasayaat ti departamento.
