LAOAG CITY – Nakasagana a mangidiaya ti P10 million kas gunggona ti Department of the Interior and Local Government (DILG) para iti impormasion a makaitudo iti pannakaarestar ti negosiante a ni Atong Ang a sumangsango iti kaso nga adda ti pakainaiganna iti kidnapping mainaig kadagiti mapukpukaw a mammallot.
Inbatad ni Department of the Interior and Local Government Secretary Jonvic Remulla, manamnama a pormal a mairakurak ti reward money ita a malem ti Huebes, Enero 15 kagiddan ti isayangkat a panagtataripnong dagiti opisial kas wagas tapno allukuyen ni Ang a sumuko.
Kunana a basar iti monitoring ti gobierno ket nagtalinaed nga adda latta ditoy Pilipinas ni Ang partikular iti Luzon.
Kabayatanna, ibilang met ti Department of the Interior and Local Government chief nga “armed and dangerous” ni Ang gapu kadagiti alegasion a maipagarup a karaman daytoy iti panangpapatay ti sumurok 100 nga indibidual kasta met ti kaadu dagiti bodyguard a maipagarup a kaduana.
Inlawlawagna a nakasagana dagiti otoridad iti aniaman a posible a mapasamak no bilang lumaban ni Ang iti kanito a maarestar.
Inpetteng met ni Philippine National Police acting chief Police Lieutenant General Jose Melencio Nartatez Jr., ad-adda a pinalawa ti pannakikoordinar ti pulisia iti Bureau of Immigration kas paset ti manhunt.
Ni Ang ket karaman kadagiti 18 nga indibidual nga addaan ti arrest warrant mainaig iti pannakapukaw dagiti mammallot.
Basar iti Philippine National Police, sumangsango ni Ang ti 15 a bilang ti kidnapping ken serious illegal detention ken uppat a bilang ti kidnapping with homicide.
Iti agdama, iggemen ti pulisia ti 17 a dadduma pay nga akusado mainaig kadagiti mapukpukaw a mammallot.
