LAOAG CITY – Nangilungalong ni Atty. Gerald Gallardo, Provincial Director ti Department of the Interior and Local Government ditoy Ilocos Norte ti maysa a resolusion a manggutigot kadagiti amin a Local Government Unit ken stakeholders a tumulong iti Palarong Pambansa.
Daytoy ket kabayatan iti naisayangkat a First Quarter Joint Provincial Peace and Order Council ken Provincial Anti-Drug Abuse Council Meeting.
Segun ken ni Atty. Gallardo, mabalin dagiti maseknan a mangipaay ti aniaman a tulong pakairamanan ti pannakaipaay dagiti masapul iti panangsangaili kadagiti nagduduma a delegasion, pinansial wenno aniaman a banag a mabalin a maipaay pakairamanan ti moral support.
Mamati daytoy a babaen iti daytoy ket masigurado ti panagballigi ti panag-host ti probinsia iti Palarong Pambansa.
Mainaig iti daytoy, inpakaammo ti Local Chief Executive iti ili ti Nueva Era, maysa kadagiti nagatendar iti nasao a taripnong a kinasaritan ti Gobernador dagiti amin a Local Chief Executive mainaig iti daytoy a banag.
Kabayatanna, inpasigurado ti Philippine National Police ken Bureau of Fire Protection a nakasaganadan ti agbalin nga akemda iti nadakamat nga aktibidad.
