LAOAG CITY – Umanamong ni Provincial Director Virgilio Sison iti Department of the Interior and Local Government (DILG) ditoy Ilocos Norte iti posible a pannakaipawil iti panaglako ti agas kadagiti Sari-Sari Store ditoy probinsia.
Daytoy ket kageddan ti pananggutigot ti DILG kadagiti amin nga LGU iti intero a pagilian a mangputar ti maysa nga ordinansa pakaseknan iti nasao a banag.
Inlawlawagna a no bilang adda ti maipasa nga ordinansa ket masapol a protektaran ti maseknan a Local Government Unit (LGU) ti salun-at dagiti residente.
Mainaig iti daytoy, kuna na a ket nasken a masigurado dagiti agpanpanday linteg iti maysa a lugar a saan nga aglaklako dagiti sakupenda a Sari-Sari Store iti aniaman ti klase na nga agas gapu ta saan nga otorisado dagitoy.
Inbatadna nga apaman nga adda ti maawatda a mandar manipod iti Higher Office ti DILG ket dagus a maipatungpal.
Immunan nga inpakaammo ni Sison a basar iti Section 30 ti Republic Act No. 10918 wenno ti Philippine Pharmacy Act ket nailanad a dagiti laeng a mapalubusan nga aglako ti agas iti publiko ket dagiti lisensyado a retail drug outlets wenno parmasiya.
Maipalagip nga adda dagiti naduktalan nga aglaklako ti peke nga agas kadagiti babassit a tiangge wenno Sari-Sari Stores pakairamanan ti maipagarup nga agas kontra iti COVID-19 iti sabali a lugar ditoy pagilian.
