LAOAG CITY – Naminsan manen nga inpasingked ni Department of the Interior and Local Government (DILG) Secretary Benhur Abalos nga agtultuloyda nga arestaren da Pastor Apollo Quiboloy pakairamanan ti napadisi a Mayor ti Bamban a ni Alice Guo tapno agsungbat iti linteg.
Inaramid ti sekretario ti nasao a rakurak iti sangoanan dagiti agpanpanday linteg kas sungbat iti dinakamat ni Kabataan Party-list Rep. Raoul Manuel.
Nasaludsod ti agpanpanday linteg no apay a marigatan dagiti otoridad a matiliw dagiti nangangato nga indibidual ngem kabaliktaran daytoy kadagiti adda laeng iti nababa nga estado iti panagbiag.
Gagem ti sekretario, dakkel man a personalidad wenno bassit ket saanda a palabsen ken arestarenda dagitoy.
Inpannakkel met ni Abalos a nangipilada ti demanda kontra iti Kingdom of Jesus Christ kalpasan ti naiwayat a raid iti lugar.
Ni Quiboloy ket sumangsango iti agsusukot a kaso kangrunaanna iti panaglabsing iti Republic Act (RA) No.7610 wenno Special Protection of Children Against Abuse, Exploitation, and Discrimination Act ken pakairamanan iti Republic Act No. 9208 wenno Qualified Human Trafficking.
Nangiruar metten ti Korte ti warrant of arrest para kadagiti nasao a kaso.
Agtultuloy a mabirbiruk ni Alice Guo a karaman met kadagiti iligal nga aktibidad ti Philippine Offshore Gaming Operator iti pagilian kangrunaanna iti lugarda.
