LAOAG CITY – Dinosdosena a Kenyan health workers ti saan a nakapasa iti English language tests nga agbalin koma a rangtay da tapno makapagtrabaho da iti National Health Service (NHS) ti United Kingdom (UK).
Daytoy ti inrakurak ni Health Minister Mutahi Kagwe iti Kenya.
Segun ken ni Kagwe, 10 laeng manipod iti 300 nga health workers a nagaplikar iti trabaho iti NHS ti nakapasa iti nasao nga eksaminasyon.
Naamoan a ti English ken Swahili ti kangrunaan a lengwahe kadagiti unibersidad ken technical institutions iti nasao a pagilyan.
Maipalagip a nagpinnirma ti Kenya ken UK ti katulagan idi Hulyo ita a tawen para iti pannakaipalubos dagiti unemployed nurses ken dadduma pay a medics a mapan agtrabaho idiay UK.
Iti agdama ket adda ti agarop 900 a Kenyas nga agtrabtrabaho iti NHS.
