LAOAG CITY – Dinosdosena a tattao ti naibalud iti ciudad ti Kampala idiay Uganda kalpasan ti pannakipaset da iti anti-corruption protests.
Inbatad dagiti abogado dagiti protesters nga agarop 60 a tattao a pakairamanan ti mabigbig a TV presenter ken tallo nga agtutubo a protest leaders ti nabalud kalpasan ti panagmartsa da agingga iti parliamento.
Immunan a nagballaag ni President Yoweri Museveni a no ituloy dagiti demonstrador ti mangiyuswat ti protesta ket arigna makiay-ayam da ti apoy.
Maipalagip nga inrakurak dagiti otoridad a saan da a nangipaay ti permit tapno agmartsa dagiti demonstrador ken saan da nga itulok ti aniaman a pangta iti seguridad iti intero nga Uganda.
