LAOAG CITY – Dinosdosena a tattao ti mapukpukaw ken addan ti maysa a kumpirmado a natay kalpasan a naarinebneb ti nagluganan da a bangka iti kabaybayan nga asideg ti border ti Thailand ken Malaysia.
Ti bangka ket mapapati a naarinebneb iti asideg ti southern Thai island ti Ko Tarutao.
Adda met ti 10 nga indibidual a naisalakan dagiti otoridad idinto a ti bangkay ti maysa a babai ket nakita nga agtatapaw iti baybay.
Patien dagiti Maritime officials a dagiti biktima ket paset ti grupo nga agarop 300 a tattao a nakalugan iti dakdakkel a bangka, ngem nagsisina dagitoy a naglugan ti babassit a bangka apaman a nakaasideg da iti Malaysia.
Naamoan a dagiti naisalakan iti asideg ti Malaysian resort of Langkawi ket pakairamanan ti tallo a lallaki manipod Myanmar, dua a Rohingya a lalaki ken maysa a lalaki manipod idiay Bangladesh.
Maipalagip a kaadoan a Muslim Rohinga community ket agturturong da iti Myanmar tapno maliklikan ti pannakaidadanes da.
