LAOAG CITY – Dinosdosena a virus ti naduktalan kadagiti ayup iti farm idiay China.
Kaadduan kadagitoy ket baro a virus ken posible a maiyakar kadagiti tattao.
Sipod pay idi COVID-19 pandemic, nagballaagen dagiti eksperto iti panangtaraken kadagiti ayup kas ti minks gapu ta al-alisto a makaptan dagitoy kadagiti virus manipud kadagiti dadduma pay nga ayup.
Segun ken ni Virologist Edward Holmes a nangidaulo iti panagsukisok maipapan iti COVID-19, mariknana a ti global fur farming industry ket maysa kadagiti wagas a pagtaudan ti baro a pandemia.
Iti babaen ti Chinese-led team dagiti researcher, nangala dagitoy ti genetic material manipud iti lung and intestine samples ti 461 nga ayup kas ti minks, rabbits, foxes ken raccoon dogs a natay iti sakit iti pagilian iti nagbaetan ti 2021 ken 2024.
Naammoan a kaadduan kadagitoy ket ti fur farms, dagiti dadduma ket manipud kadagiti farm para iti taraon ken traditional medicine pakairamanan ti 50 ti wild animals.
Mainaig iti daytoy, naduktalan ti team ti 125 a virus pakairamanan ti 36 a baro a virus.
Kabayatanna, 39 a virus ditoy ket maibilang nga “high risk” a maiyakar kadagiti dadduma nga ayup pakairamanan dagiti tattao no sadinno sumagmamano kadagitoy a virus ket hepatitis E ken Japanese encephalitis ket naiyakaren kadagiti tattao.
