LAOAG CITY – Kinumpirmaran dagiti dinosdosena a world leaders ti panagatendar da iti pannakaitabon ni Pope Francis intono sabado, April 26 ita a tawen.
Karaman kadagiti siguradon nga agatendar iti pannakaitabon ti santo papa ket da Argentinian President Javier Milei, US President Donald Trump kadwa na ni First Lady Melania Trump, French President Emmanuel Macron, Ukrainian President Volodymyr Zelensky ken dadduma pay.
Maitabon ni Pope Francis iti Basilica of St Mary Major iti Roma, asideg ti paborito na nga icon ti Madonna.
Kabayatanna, inwaragawag ti Vatican a maikabil ni Pope Francis iti St. Peter’s Basilica intono bigat.
Agtalinaed ti santo papa iti lugar agingga iti pannakaitabon na para iti panangipaay ti publiko ti respeto kenkuana.
Iti agdama ket nakamansayag paylaeng ni Pope Francis iti chapel iti Santa Marta residence a nagnaedan na iti uneg ti 12 a tawen a panagserbi na kas santo papa.
