LAOAG CITY – Maluksaw ken maladingitan ni Father Joey Ranjo, pannakangiwat ti Diocese of Laoag iti ipupusay ni Cebu Archbishop Emeritus Ricardo Cardinal Vidal, ti Most Senior Cardinal iti tawen na nga 86.
Inbatad na nga iti kangrunaan nga aramiden da ket ti panangikarkararag ti kararwa na, ken panagyaman ti panagserbi na iti Isglesia Katolika.
Segun kenni Father Ranjo, iyuray da ti Obispo no ania ti masapol nga addang nga aramiden da mainaig ti pannakatay ni Cardinal Vidal.
Inlawlawag na a ti kangrunaan a maar-aramid no matay ti maysa nga opisyal ti simbaan ket ti panangirikep ti kuarto na agingga a saan a maitabon.
Kuna ni Father Ranjo a kas kadagiti imum-unan a naaramid, maitabon iti uneg ti Cathedral ti bangkay ti Cardinal ken mapakammoan ti Santo Papa mainaig iti daytoy.
