LAOAG CITY – Manamnama a maisubli ti biahe manipud Kaohsiung Taiwan nga umay ditoy probinsia partikular iti Laoag International Airport.
Segun kenni Mr. Aian Raquel, mangidadaulo ti Provincial Tourism Office, daytoy ket babaen ti katulagan a ti probinsia, Manila Economic Cultural Office ken ti nasao a pagilyan a mai-market ti probinsia idiay Taiwan.
Kunana a daytoy ti resulta ti trade mission a nabayagda a trinabaho manipod pay idi gobernador ni Vice Governor Matthew Marcos Manotoc ken idi Bise Gobernador Ni Gov. Cecilia Araneta-Marcos.
Inbatadna a ti nasao a flight ket posible a chartered gapu ta dati ket isu ti maus-usar manipod 90’s agingga iti 2000 ngem kalikagomda nga agbalin daytoy a long-term regular flight.
Inlawlawagna nga ado a sektor dagiti mabenepisyaran iti daytoy kas iti pannakaiyam-ammo ti kultura, family trip, ken dagiti estudyante nga umay agsursuro ti Ingles nangruna ket adda ti programa ti Mariano Marcos State University ken Northwestern University maipanggep iti daytoy.
Innayonna nga umabot iti 300 a ribo a pisos ti magastos ti gobierno probinsyal idinto a ti Manila Economic Cultural Office ket 1.5 million pesos.
Kabayatanna, naamoan nga intono October 12 ket adda dagiti umay mangiyuswat ti film making para ti marketing campaign manipud Taiwan.
