LAOAG CITY – Inbatad ni Brgy. Kagawad Darwin Domingo, Chairman ti Committee on Health iti Brgy. 1 ditoy siudad ti Laoag nga agtultuloy ti pannakamonitor iti discolandia.
Daytoy ket kalpasan a naipatungpal ti lockdown gapu kadagiti residente a nagpositibo iti covid-19.
Immuna iti daytoy, inlawlawag ni Domingo nga adda ti naiyuswat a surveillance antigen testing kadagiti agnanaed iti discolandia.
Nu pay kasta, inbatad na a 39 laeng manipod iti nasurok 200 nga agnanaed iti discolandia ti boluntaryo a dimmalan iti antigen test.
Kuna na a manipod iti 39 ket maysa ti nagpositibo ken manamnama a dumalan iti swab test ita nga aldaw.
Mainaig iti daytoy, inbunannag ni Domingo a dagiti nagkedked a dimmalan iti antigen ket isuda ti kangrunaan a mapawilan a rumuar ken laeng dagiti nagnegatibo iti antigen test ket isuda pay laeng ti mapalubusan a rumuar.
Inpakaammo ti barangay kagawad nga iti agdama ket adda ti 23 nga aktibo a kaso ti covid-19 iti Brgy. 1 pakairamanan dagiti walo a covid-19 positive nga agnanaed iti discolandia.
