LAOAG CITY – Maysa nga agtawen ti 59 a DJ ti nakagun-od ti world record gapu ta sumurok maysa a lawas daytoy a nag-perform iti maysa a club idiay Italy.
Kinumpirmaran ti records keeping organization a Guinness World Records a ni Fabrizio Morero wenno mas am-ammo kas DJ Faber Moreira ti baro a record holder ti titulo a “Longest Marathon Club DJ-ing.”
Daytoy ket kalpasan a nagpatukar nga awan ti sardengna iti uneg ti sangapulo nga aldaw.
Naiyuswat ti marathon ni Morero iti maysa a club iti Saluzzo idi Mayo 15 ken naglippas daytoy ti Mayo 26. Iti stage no sadino agper-perform ni Morero ket adda ti naka-set up a kama tapno ditoy isuna nga aginana.
Tapno saan a maapektaran ti salun-atna nga ag-record attempt, adda ti pammalubos ti Guinness nga aginana ti lima a minuto iti tunggal maysa nga oras a panag-DJ.
Inbatad ni Morero, nagbalin nga alisto kenkuana iti umuna a tallo nga aldaw ngem idi makadanon isuna iti maikalima nga aldaw ket nakarikna daytoy ti epekto ti kurang iti turog.
Karigatan kenkuana dagiti naud-udi nga aldaw gapu ta makaturturog daytoy iti mixer-na ken kasapulanna a mapartsakan ti nalamiis a danum iti rupana tapno makariing.
Sakbay nga inaramid ni Morero ti Guinness record attempt daytoy, dua a tawenna a sinaganaan babaen iti tulong dagiti personal trainer, nutritionist, physiotherapist ken yoga guru. Naammoan a ni Fabrizio Morero wenno “DJ Faber Moreira” nga agpatpatukar iti las-ud ti sangapulo nga oras para iti Guinness Record.
