LAOAG CITY – Manamnama ti pannakaestablisar iti mabiit ti Department of Migrant Workers Desk ditoy siudad ti Laoag.
Daytoy ti inpakaamo ni Sangguniang Panlungsod Member Juan Conrado Respisio II, Chairman ti Committee on Labor and Civil Service.
Segun ken ni Respisio, adu dagiti Overseas Filipino Worker ditoy siudad nga agkasapulan ti tulong isu’t gapuna a kalikagumda maestablisar iti mabaiit daytoy tapno as-asideg ti pagpatulungan dagitoy.
Inbatadna a babaen iti tulong ti Philippine Migrant National Office ket mapaalisto ti pannakaestablisar ti DMW Desk ditoy siudad ti Laoag.
Inlawlawagna a babaen iti daytoy ket ad-adda a maiyasideg ti serbisio para kadagiti agkasapulan ti tulong nga Overseas Filipino Workers.
Kunana nga apaman a naan-anay a maipatungpal daytoy ket saanen a kasapulan pay nga agbiahe wenno agturong dagiti maseknan nga Overseas Filipino Workers iti regional office tapno agpatulong.
Innayonna a maidiaya pay dagiti nagduduma a programa kadagiti Overseas Filipino Workers tapno maipasigurado a matulungan dagitoy.
