LAOAG CITY – Ginutigot ti Department of Migrant Workers (DMW) ti publiko nga ireport a dagus dagiti tattao a mangididiaya ti peke nga Overseas Employment Certificates (OEC).
Inaramid daytoy ti Department of Migrant Workers kalpasan a natiliw ti Bureau of Immigration ti maysa a babai a pumanaw koma iti pagilian gapu ta naduktalan a peke ti inpresentar na nga Overseas Employment Certificates.
Nagpalagip ti Department of Migrant Workers nga agbalin a nasirib ken saan nga agpaloko para iti alisto a pannakaiproseso dagiti dokumento para iti alisto nga ipapanaw iti pagilian ken agtrabaho iti ballasiw taaw, tapno saan a mabiktima ti illegal recruitment, human trafficking, ken online scams.
