LAOAG CITY – Inpasigurado ti Department of Migrant Workers (DMW) a nakasagana ti ahensia a tulungan dagiti Pilipino a timmalaw idiay Lebanon iti baet ti mapaspasaran a tension iti nasao a pagilian.
Segun ken ni Department of Migrant Workers Secretary Hans Leo Cacdac, agbirbiruken iti agdama ti ahensia ti posible a lugar a mabalin a pangibakwitan kadagiti Pilipino nga agkalikagum a tumalaw iti lugar.
Maipalagip nga idi kalman, aldaw ti Sabado, sinarabo ti Department of Migrant Workers ken Overseas Workers Welfare Administration ti nasurok maysa a dosena nga Overseas Filipino Workers pakairamanan dagiti ubbing a na-repatriate manipud idiay Lebanon.
Inbatad ni Cacdac a dagiti simmangpet nga Overseas Filipino Worker ket boluntario a nagkiddaw ti repatriation ken nakaawat dagitoy ti maiyannatop a tulong iti gobierno.
Naiyuswat ti repatriation kadagiti Overseas Filipino Worker idiay Lebanon iti pannakikoordinar ti Department of Foreign Affairs (DFA).
Immuna iti daytoy, idi Biernes ket nangiruar ti pakdaar ti Philippine Embassy idiay Lebanon a masapolen a talawan ti lugar kabayatan a nakalukat pay ti erupuerto.
Naammoan a nangrugi a bimmara ti tension iti nagbaetan ti Lebanon-based Hezbollah ken Israel.
