LAOAG CITY – Inbatad ti Department of National Defense (DND) a nakasagana da a tumulong kadagiti ahensya a mangimatmaton iti pannakaibakwit dagiti Pilipino nga adda idiay Ukraine ken maip-ipit iti iraraot ti Russia.
Segun ken ni Defense Secretary Delfin Lorenzana, naiget ti panangsubsubaybay da iti sitwasyon idiay Ukraine.
Mangnamnama ni Lorenzana a ti sitwasyon idiay Ukraine ket saanen a kumaro pay ken masolbar iti naindimplomasyaan a wagas ken naiyataday iti international rules.
Nagturong a mismo ni DFA Secretary Teodoro Locsin Jr. iti Ukrainian border tapno personal nga iwanwan ti panagbakwit ken masigurado ti seguridad dagiti Pilipino idiay Ukraine.
Mapatta-patta nga umabot iti 380 a Pilipino ti adda idiay Ukraine ken addan ti sumagmamano a nagawid ditoy Pilipinas idinto a dagiti dadduma ket nagbakwit kadwa da dagiti amo da.
