LAOAG CITY – Inlawlawag ni Doc. Alan Taylan ti St. Camillus de Lellis Hospital ditoy siudad ti Laoag a ti sakit nga anthrax ket maysa a seryoso a sakit a mangparisgo iti salun-at ti tao
Segun ken ni Doc. Taylan, ti anthrax ket natural a mikrobyo manipud iti daga no sadinno a dagiti herbivores a dingwen ti kangrunaan a maap-apektaran.
Kunana nga adda nagduduma a wagas no kasano a maapektaran ti tao iti nasao a sakit.
Umuna ti maaw-awagan a Cutaneous anthrax, daytoy ket no adda sugat ti maysa nga indibidwal ken addaan daytoy ti taraken a baka, baboy, kabalyo, kalding ken nuang ket adda posibilidad a sumrek ti mikrobyo iti sugat.
Maikadwa ket iti babaen ti paannakalang-ab iti mikrobyo a mangitunda iti inhalation anthrax.
Maikatlo ket ti Gastrointestinal anthrax, daytoy ket no makapangan ti maysa nga indibidual iti karne ti baka, baboy, kabalyo, kalding ken nuang, nangruna no saan a naluto a nasayaat maapektaran iti nasao a sakit.
Mainaig iti daytoy inpakaammu pay ni Doktor Taylan dagiti mabalin a sintomas ti nasao a sakit, sumagmamano kadagitoy ket ti panaggurigor, panagbakwar, panagtubo ti budo-budo, panagtakki, pannakarigat nga aganges, aguyek ti dara, ken dadduma pay.
Mainiag iti daytoy, pinasingkedan na pay a kas kadagiti nagduduma a sakit ket kadawyan met laeng a maapapektaran ket dagiti nakapsot ti naturalesa ti bagi ti maysa a tao.
Kabayatanna, pinalagipan ni Doc. Taylan ti publiko a liklikan ti panagparti kadagiti dingwen nga addaanen ti sakit wenno dagiti dandanin a matay gapu ta adda posibilidad a naipektaran dagitoy iti sakit nga anthrax.
