LAOAG CITY – Inlawlawag ni Doctor Alan Taylan ti epekto ti party drugs kas ti ecstacy iti bagi ti maysa a tao.
Segun ken ni Doctor Taylan, no makatumar ti ecstacy ket ado dagiti mabalin a mapasaran, depende pay no kasanu ti kaado ti mainom iti daytoy.
Kuna na a karaman kadagiti possible a mapasaran ti maysa a tao ket arigna nakapigpigsa ti bagi, agbalin nga hyper nga arigna awanen ti bibiangna iti aglawlaw, agresibo, ken dadduma pay.
Nupay kasta, nagballaag ni Doctor Taylan a possible a ngumato ti blood pressure, pumigsa ti pitik iti puso, ngumato temperatura iti bagi, aglingling-et ken arigna tumtumpaw ti bagi.
Innayon na a no saan a masalwadan ket mabalin nga agkombulsyon, heart attack ken ma-stroke.
Mainaig iti daytoy, inpakaammo ni Doctor Taylan a no naigameren ti maysa a tao iti ecstacy ket madlaw babaen ti arigna paranoid ti maseknan, mulmulagatan na ti tao ken agmalmalanga nga arigna ado dagiti kalaban na, idinto a dagiti sagpaminsan laeng nga agusar iti nasao nga agas ket awan pulos ti pagilasinan.
Immuna iti daytoy, inrakurak ti Philippine National Police a naiget ti panagbanbantay da iti panagwaras ti party drugs kas ti ecstacy kadagiti mabigbig a tourist destination.
Daytoy ket gapu ta basar iti datos ket agbalbalin a napigsa ti pannakailako dagiti party drugs tunggal bakasyon a kaadoan ket dagiti agtutubo ti biktima.
Maipalagip nga idi Marso 2016 ket adda ti lima nga agtutubo a pimmusay kalpasan a na-overdose iti party drugs iti papanda panagbuya ti konsierto.
