LAOAG CITY – Inlawlawag ni Dr. Eliezer Asuncion, ti Chief of Hospital ti Laoag CIty General Hospital ditoy ciudad ti pannakaitantan ti pannakaited ti pondo kadagiti empleyado ti nasao nga ospital.
Maysa kadagiti rason iti pannakaitantan ti pannakaited ti pondo ket ti transition period a nagsukat dagiti assignatories para iti pannakai-withdraw koma ti nasao a pondo.
Agdagup ti 3, 304, 394 ti nasao a pondo ti LCGH.
Nailatang ti nasao a pondo manipod iti Philhealth payments a pakaibilangan ti service patients fund ken private patients fund.
Mainaig iti daytoy, ti 50 a porsyento ti service patients fund ket mapan kadagiti doktor idinto a ti nabati ket mabingay-bingay para kadagiti amin nga empleyado ti nasao nga ospital a maited kadakuada iti kada bulan.
Kabayatanna, ti private patients fund ket naggapo iti serbisyo dagiti doktor a mangat-atendar kadagiti pribado a pasyente pakairamanan dagiti walk-in patients.
Naamoan a paset ti private patients fund ket maawagan a philhealth hospital fund wenno professional fee share of employees a boluntaryo nga ited dagiti doktor manipod kadagiti professional fee da manipod Philhealth.
Nasurok a 1 milyon a pisos manipod ti nasao a pondo a naggapo iti professional fee dagiti doktor ket nailatang para iti training and development da.
Inadmitir ni Asuncion a manarimaan pay laeng iti panangduktal da no apay a saan a regular ti sistema iti pannakaimanihir ti nasao nga ospital.
Nupay kasta, inpakaammo na a naibunongen ti professional’s fee dagiti empleyado ti LCGH.
