LAOAG CITY – Mangisaysayangkat ti inventory ti Bureau of Customs (BOC) kadagiti nakumpiskarda a taraon, ramit ken agricultural products.
Basar iti Department of Finance nga ad-adalenda no dagitoy a banag ket mabalin nga idunar kadagiti biktima ti Bagyo Carina.
Isagsagana met ti Department of Finance nga iruar $500 milyon nga standby credit line tapno mausar dagus ti gobierno iti panangipaay ti serbisio kas kadagiti healthcare, taraon ken pagtarusan kadagiti naapektaran ti bagyo.
Naammoan a ti loan ket posible nga agbalin a post-disaster emergency response, recovery ken reconstruction efforts.
Mainaig iti daytoy, agsingir met ti Bureau of Treasury iti babaen ti National Indemnity Insurance Program (NIIP) para iti nadadael nga 45 a public schools kadagiti walo a rehion nga agbalor iti P308.5 a milyon.
Kabayatanna, apaman a mairuar ti pundo ket mabalin nga usaren daytoy ti Department of Education iti pannakatarimaan kadagiti maseknan a pagadalan.
