LAOAG CITY – Ginutigot manen ti Department of Health ti publiko nga agpabakuna tapno maliklikan dagiti sakit a mabalin maliklikan.
Inpetteng ti ahensya a ti panagpabakuna ket maysa kadagiti kaepektiboan a wagas tapno maprotehiran kontra iti nakaro a sakit ken pannakatay.
Iti maysa nga abiso ti Department of Health, mabalin a maala dagiti sumagmamano a bakuna a libre kadagiti Health centers ken DOH-Bagong Urgent Care and Ambulatory Service (BUCAS) centers iti intero a pagilian.
Karaman ditoy ti BCG vaccine a panglaban ti tuberculosis, Hepatitis B vaccine, Pentavalent vaccine, Oral Polio Vaccine (OPV), Inactivated Polio Vaccine (IPV), Measles, Mumps, Rubella (MMR) vaccine, Influenza vaccine ken dadduma pay.
Innayon ti ahensya a dagitoy a bakuna ket napaneknekan a natalged ken epektibo tapno saan a maospital ken maliklikan dagiti makapatay a sakit.
