LAOAG CITY – Inlawlawag ti Department of Health (DOH) nga awan ti baro a virus nga agwarwaras iti pagilian iti baet ti panagado ti kaso ti influenza-like illnesses (ILI) ita a flu season.
Basar iti datos ti departamento, ti umun-una a tallo a makaigapu ti influenza-like illnesses (ILI) ket ti Influenza A, Rhinovirus, ken Enterovirus, idinto a ti SARS-CoV-2 wenno COVID-19 virus ket adda iti maika-sangapulo a puwesto laeng, a bukbuklen ti maysa a porsyento dagiti kaso.
Iti maysa nga statement, inpetteng ti ahensya nga adda ti bileg dagiti government units (LGUs) iti babaen ti Republic Act No. 11332 a mangipatungpal kadagiti maiyannatop nga health measures basar iti sitwasyon dagiti masakupan da,
Daytoy ket kalpasan a nangipatungpal ti gobierno ti Quezon ti mandatory a panagsuot ti face mask iti indoor ken outdoor settings nga awan ti physical distancing gapu iti ngumatmangato a kaso dagiti sakit iti lugar.
Inpetteng pay ti Department of Health a panawen ita ti trangkaso, isut gapuna a napateg nga ipatungpal dagiti basic health practices kas ti masansan a panagugas ti ima, panagsuot ti face mask no addaan ti sintomas wenno para iti bukod a proteksiyon, panagpabakuna, panangkalob ti bibig no aguy-uyek, pannangan kadagiti nasustansya a taraon, panag-ehersisyo, liklikan ti agsigarilyo ken vaping, uminom ti ado a danom ket maaddaan ti umdas a panaginana.
Kabayatanna, iti kaudian a datos ti Department of Health, umabot iti nasurok a 133,000 a kaso ti influenza-like illnesses ti nairekord idi Setyembre, nababbaba no ikumpara iti 155,000 a kaso iti kapada a bolan iti napalabas a tawen.
Immunan nga inbatad ni Health Secretary Ted Herbosa, a nupay ado dagiti agsasakit, daytoy ket gapu iti nagduduma a klase ti virus ken awan ti outbreak manipod iti maymaysa a virus ken awan ti rason tapno agdeklarar ti lockdown, ngem inrekomendar ti ahensya ti panagsuot ti face mask wenno panagtalinaed iti balay no adda ti sagsagabaen a sakit.
