LAOAG CITY – Inpetteng ti Department of Health a ti administrasyon ni Presidente Ferdinand Marcos Jr ket nagtalinaed a nakatutuk iti pannakaipasigurado ti pagsayaatan ti local ken international tourist iti Pilipinas.
Inaramid daytoy ni Health Secretary Ted Herbosa bayat ti panagatendar na iti kaunaan a Tourist First Aid Facilities iti pagilian.
Segun iti sekretaryo, ti nasao nga inisyatibo ket maiyallubog iti direktiba ni Presidente Marcos.
Kuna na a daytoy ket maibilang a maysa nga addang tapno maipakita ti sibubukel a commitment ti Department of Health iti pannakapapigsa ti kinaurnus dagiti local ken international tourist nga agturturong kadagiti kangrunaan a destinasyon iti Pilipinas.
Innayon ni Herbosa a mandato pay ti Department of Health nga iyasideg kadagiti turista ti aniaman a klase ti medical assistance.
Mamati pay ti sekretaryo a dakkel ti maitulong na iti pannakapagtalinaed ti gagem ti health tourism iti Pilipinas.
