LAOAG CITY – Inrakurak ti Department of Health nga adda ti nagduduma a wagas tapno masolbar ti teen pregnancy kageddan ti kontrobersial a Senate Bill 1979 wenno ti Adolescent Pregnancy Prevention Bill.
Inpetteng ti Department of Health a saan a kasapulan a maaddaan ti baro a linteg tapno masolbar ti isyu no di ket ti masapol laeng ket ti umiso a pannakaipatungpal ti Responsible Parenthood and Reproductive Health Law of 2012 (RH Law).
Segun ken ni Department of Health Assistant Secretary Dr. Albert Domingo, maysa kadagiti umiso a pannakaipatungpal ti linteg ket ti panangala ti health professionals wenno kadagiti eksperto tapno maisuro kadagiti estudiante.
Kunana nga adda ti shortage dagiti mangisursuro iti pagilian isu a maysa a solusion ket ti panangala dagiti nurse kadagiti pagadalan.
