LAOAG CITY – Inpasigurado ti Department of Health (DOH) iti publiko a dagiti ospital idiay Metro Manila ket nakasagana ken addaan ti kapasidad a tumulong iti kanito a sumangbay ti maaw-awagan a “The Big One,” maysa a dakkel a gingined a mabalin a marikna iti rehion.
Inpasingked ni Department of Health Secretary Ted Herbosa nga amin nga ospital nga imatmatonan ti Department of Health ket addaa ti kabaelan a mangnayon ti 10% iti agdama a bed capacity.
Daytoy ket tapno masigurado nga ad-adu a pasiente ti mabalin a maakomodar no bilang agkasapulan ti naig-iget a tulong para iti serbisio medikal kalpasan ti maysa a dakkel a didigra.
Malaksid iti daytoy, inbatad ni Secretary Herbosa a ti tunggal ospital ket addaanen ti contingency plan a nakasaganan nga ipatungpal.
Gagem dagitoy a plano a siguradoen kadagiti ospital ket mabalin nga agtultuloy iti panangipaay ti serbisio kadagiti pasiente iti baet ti nakaro a kalamidad.
Inpetteng ni Herbosa a dagiti Department of Health hospitals a masarakan iti Four Quadrants ti National Capital Region (NCR) ket addaan ti umdas a surge capacity.
Kunana a dagiti ospital ket addaan ti umanay nga emergency supplies kas kadagiti agas, medical supplies ken dadduma pay a kagamitan a kasapulan iti panangsungbat iti maysa a dakkel a didigra.
Innayon pay ni Secretary Herbosa nga amin dagitoy ket paset ti napaigetan a disaster preparedness ti ahensia.
