LAOAG CITY – Mangiparuk-at ti Department of Health (DOH) ti baro a pagannurutan iti panangipaay ti Medical Assistance for Indigent and Financially Incapacitated Patients (MAIFIP) sakbay nga agngudo ti Pebrero ti agdama a tawen.
Segun ken ni Health Spokesperson Assistant Sec. Albert Domingo, ti baro a guidelines ket maiyataday iti direktiba ni Presidente Ferdinand Marcos Jr. a mangipawil ti panagusar ti guarantee letters manipod kadagiti naelektaran nga opisyal tapno mabayadan dagiti hospital bill dagiti pasyente kadagiti ospital, a nailanad iti probisyon iti babaen ti 2026 General Appropriations Act (GAA).
Iti babaen ti narepaso a Medical Assistance for Indigent and Financially Incapacitated Patients framework, iyalud-od pay ti Department of Health ti masakupan ti benepisyo tapno mairaman ti outpatient ken specialized services.
Karaman ditoy ti ambulatory care, ambulatory surgical clinics, eye centers, opthalmology services, dental services, free-standing dialysis clinics, ken dagiti agas nga inaprubaran ti Food and Drugs Administration (FDA).
Segun ken ni Assistant Sec. Domingo, maysa kadagiti kadakkelan a panagbalbaliw ket ti naan-anay a pannakairaman iti professional fees dagiti doktor.
Inlawlawag ti Department of Health a ti expanded coverage ket mapondoan manipod iti nangatngato nga alokasyon a pondo para iti Medical Assistance for Indigent and Financially Incapacitated Patients ita a tawen.
