LAOAG CITY – Nagballaag ti Department of Health (DOH) kontra iti pannangan ti wild mushroom kalpasan a naipadamag ti pannakasabidong ti 24 a tattao idiay Mountain Province ken Benguet.
Segun ken ni Ms. Karen Lonogan, Development Management Officer IV ken mangidadaulo ti Regional Epidemiology and Services Unit ti Department of Health-Cordillera Administrative Region (DOH-CAR), nairekord ti 11 a kaso ti pannakasabidong pakairamanan ti 34 a tattao iti uppat a munisipalidad ti Benguet ken lima manipud idiay Mountain Province manipud idi Mayo 21 agingga Hunio 27.
Iti 34 a biktima, 25 ti naitaray kadagiti nagduduma nga ospital idinto dagiti dadduma ket nakaawiden kadagiti pagtaenganda.
Ginutigot ti maseknan nga ahensia ti publiko a gumatang laengen kadagiti agmulmula iti natalged a mushroom.
Naammoan a masansan nga agtubtubo dagiti mushroom kadagiti kapagayan ken kabambantayan tunggal panagtutudo.
Kabayatanna, inpakaammo ti Department of Health a dagiti mushroom a saanen a mabalin a kanen ket addaan ti toxins a target daytoy iti gastrointestinal system ken nervous system.
