LAOAG CITY – Nagballaag ti Department of Health iti publiko nga agtalinaed iti pagtaengan ken agsuot ti N95 mask tapno maliklikan ti pannakaapektar iti ‘haze’ wenno narugit nga angin.
Daytoy ket kagiddan ti naobserbaran nga haze iti sumagmamano a lugar idiay Quezon City ken probinsia ti Rizal kadagiti napalabas nga aldaw kas basar iti Department of Environment and Natural Resources (DENR) gubuay kadagiti napasamak nga uram.
Pinalagipan pay ti ahensia ti publiko a kitaen ti Air Quality Index (AQI) kadagiti lugarda tapno makatulong a maliklikan ti narugit nga angin.
Inbatad ni Health spokesperson ASec. Albert Domingo, adda ti dua a masansan a maus-usar nga indicator para iti Air Quality Index, daytoy ket ti Particulate Matter 10 micrometers (PM 10) ken PM 2.5, nga agpada a masansan nga aggapu kadagiti emisyon ti lugan, panagpuor ti basura, wildfire wenno dagiti insidente ti uram.
