LAOAG CITY – Nagballaag ti Department of Health (DOH) iti publiko nga agannad kontra kadagiti sakit nga adda ti pakainaiganna iti ‘Holiday Heart Syndrome,’ kas ti stroke gapu iti napalabas a paskua ken panangsarabo ti baro a tawen.
Segun ken ni Health Secretary Teodoro Herbosa, ti Holiday Heart Syndrome ket maysa a kondision gapu iti nalabes a panaginom ti arak, stress, kinakurang ti panaginana ken ti taraon a naapgad wenno natataba a mangpangato iti presyon a mabalin a mangitunda iti arrhythmia wenno abnormal nga heart rhythm a maysa kadagiti maikagapu ti stroke.
Iti panagsursursuro ti Department of Health, inpakita ti Philippine Heart Center (PHC) a ngimmato iti sumurok-kumurang nga 60 ti kaso ti Stroke manipud iti Hulio agingga iti Nobiembre 2024 a tinutukan ti ospital.
Adda ti nairekord a pito a kaso ti stroke sakbay pay ti paskua wenno manipud idi Disiembre 1 agingga iti 20, 2024.
Posible a ngumato pay ti bilang kalpasan ti paskua ken inton panangsarabo iti baro a tawen no saan a malappedan ti nalabes a panaginom.
Naammoan a ti 110 a kaso met ti Acute Coronary Heart Syndrome a nairekord iti Philippine Heart Center idi Disiembre 2023 ket ngimmato ti 115 apaman a natapogan ti Enero 2024.
