LAOAG CITY – Nagballaag ni Undersecretary Gerry Bayugo ti Department of Health (DOH) kontra iti sakit a leptospirosis kadagiti nalayos a residente gapu ti bagyo Ineng ditoy probinsya ti Ilocos Norte.
Iti press briefing a naisayangkat iti provincial capitol ditoy probinsya, inbatad ni Bayugo nga ado dagiti inbunong da nga agas ditoy probinsya para iti nasao a sakit.
Inlawlawag ni Bayugo a saan a rumbeng a balewalaen ti sakit a leptospirosis gapu ta mabalin nga ipatay daytoy ti maysa a tao.
Kuna na a no mabaybay-an ti sakit a leptospirosis ket mangitunda ti komplikasyon nga agresulta ti pannakatay ti pasyente.
Immunan a kinumpirmaran ni Doctor Marie Joyce Urnos-Santos, Infectious Disease Specialist iti Mariano Marcos Memorial Hospital and Medical Center idiay ciudad ti Laoag a maysan ti natay ditoy Ilocos Norte gapu iti sakit a leptospirosis.
