LAOAG CITY – Madanagan ken naalerto ti Department of Health (DOH) gapu iti week-on-week upward trend dagiti kaso ti kamuras no sadino adda ti 1,627 a kaso ti nairekord manipud Enero 1 agingga Abril 6 a maminlima a nangatngato ngem ti 308 a kaso idi 2023.
Naideklara ti panagraira ti sakit iti Bangsamoro Autonomous Region in Muslim Mindanao (BARMM) nga addaan iti 48% a kaso ti kamuras ditoy pagilian, segun ken ni Department of Health spokesperson Assistant Secretary Albert Domingo.
Segun ken ni Domingo, mangrugin nga agparang ti measles rashes iti rupa nga agpababa agingga iti dadduma a paset ti bagi.
Nupay kasta ti sabali pay a pakaseknan iti kaadda ti kamuras ket ti komplikasion a kakuykuyog daytoy nangruna no nakaro a pakairamanan ti pulmonia ken encephalitis wenno ti panaglammin ti utek a mabalin a makapatay.
Ti balakad ni Domingo, ti panagbakuna ket nasayaat a wagas tapno malapdan ti kamuras agraman ti panangsurot iti kinadalus ti aglawlaw, panagtalinaed iti pagtaengan no saan a nasayaat ti rikna ken panagpakonsultar iti doktor no adda dagiti sintomas.
Siniguradona pay nga adda umdas a suplay ti bakuna para iti nationwide routine childhood immunization kadagiti health centers ken public schools ken para iti outbreak response iti BARMM.
Iti nadakamat a rehion, 944,595 kadagiti 1.3 milyon a target nga ubbing ti nabakunaan idi Abril 16.
Ti Department of Health ket addaan iti imbentario iti 3.7 milion a doses ti 3-in-1 measles-mumps-rubella (MMR) vaccines ken 1.7 milyon a doses ti 2-in-1 measles-rubella vaccine agingga idi Abril 17.
Nag-order ti Department of Health iti kanayonan a doses ti bakuna ti MMR– 5.7 milyon idi Hunio ken Hulio, sabali pay a 5 milyon iti maikatlo a kuarter ken 1.4 milyon iti maikapat a kuarter.
