LAOAG CITY – Nagballaag ti Department of Health (DOH) iti publiko kontra iti heat-related illnesses kas ti heat cramps, heat exhaustion ken heat stroke nga ad-adda nga agraira ita a sumrek ti dry season ditoy pagilian.
Daytoy ket basar iti state weather bureau a PAGASA iti sumagmamano a lugar a mabalin a makapasar ti napeggad nga antas ti heat index.
Inbatad ni Department of Health spokesperson Asssitant secretary Albert Domingo a ti nangato a temperatura ket mabalin a mangitunda iti heat cramps ken heat exhaustion pakairamanan dagiti sintomas kas ti pannakabannog, pannakaulaw, sakit ti ulo ken panag-vomit.
Nagpalagip ni Domingo, ti nakaro a pannakabilag iti init ket mangipangato iti posibilidad ti heat stroke, maysa a seryoso a kondision a maawanan ti puot, seizure, kumbulsion a mabalin nga ipatay no saan a maag-agasan.
