LAOAG CITY – Namnamaen ti Department of Health (DOH) nga aprobaran ti Food and Drug Administration ti baro a bakuna kontra dengue ita a tawen 2024.
Daytoy ti inpablaak ni Health Secretary Ted Herbosa kalpasan a nakairekord iti 15% a nangatngato a kaso iti umuna nga innem a bulan ti 2024 no idilig iti isu met laeng a panawen idi 2023.
Segun iti sekretario, nag-aplayen ti Japan-based Takeda Pharmaceuticals tapno makaala ti sertipikasyon para iti product registration ti bakunada a QDENGA manipud iti Food and Drug Administration idi napan a tawen.
Adadalen met ti FDA dagiti requirements nga insubmitir ti Takeda Pharmaceuticals, maysa kadagiti kadakkelan a pharma companies iti lubong, sakbay nga aprobaran ti bakuna ken ipatulodda ditoy Pilipinas.
Kinunana a kadawyan a makatawen ti proseso, isu a posible a maaprobaran ti aplikasionda iti aniaman nga oras ita a tawen.
