LAOAG CITY – Inrubuat ti Deparment of Health (DOH) kabinnulig ti lokal a gobierno ti Caloocan ken dadduma pay nga organisasion ti health and wellness event a sakbay ti World Tuberculosis (TB) Day inton Marso 24.
Daytoy nga inisyatiba ket naisayangkat iti Caloocan Sports Complex iti North Caloocan a gagem nga ilungalong ti nasapa a panangduktal ken panangagas ti TB kabayatan a maitantandudo ti maipanggep iti epekto daytoy iti salun-at ken ekonomia.
Malaksid iti screening ti TB, dagiti agatendar ket adda pay ti access-na kadagiti nayon a serbisio iti salun-at pakairamanan ti:
* HIV testing ken screening
* Risk assessment and prevention
* Health educational session
Iti panangipaay ti acessible screening ken treatment, mangnamnama ti Deparment of Health a magutigot ti ad-adu pay a Pilipino nga agaramid ti proactive measures iti panangsalaknib iti bagida iti TB ken dadduma pay a makaakar a sakit.
