LAOAG CITY – Nangipaay ti nagduduma a medical equipment ti Department of Health para kadagiti ospital nga iwanwanwan ti gobierno probinsial ti Ilocos Norte.
Segun ken ni Dr. Rogelio Balbag, Executive Director ti Hospital Management Council ti Provincial Government of Ilocos Norte, dagitoy ket kiniddaw ni Gob. Matthew Marcos Manotoc tapno ad-adda a mapatalged ken mapasayaat ti serbisio dagiti ospital ti probinsia kadagiti pasiente.
Inlawlawagna a malaksid iti baro nga “oxygen refilling plant” iti Gov. Roque B. Ablan Sr. Mem. Hospital a dumaldalan iti “testing period” a naikalikagum a naiyestablisar babaen iti gobernador ket adda dagiti baro a kagamitan a naggapu iti Department of Health kas iti baro a mammogram ken dandani metten agoperar ti Dialysis Center.
Inbatadna nga iti agdama ket addan dagiti nakasagana nga agserbi a nurses ken doktor iti nasao a pasilidad ken maiyur-uray laengen ti pannakaiyinstolar ti maudi a kagamitan.
Inpakaammona nga iti Bangui District Hospital karaman kadagiti baro a kagamitan nga inpaay ti Department of Health ti anesthesia machine, cardiac monitor, ultra sound ken adda pay ti sumarsaruno.
Kunana a manamnama a maaddaanto pay ti CT scan nupay iti agdama ket awan pay ti pasdek a nakasagana a pakaipananna.
Malaksid iti daytoy, kunana a manamnamaa maaddaanto pay ti nasao nga ospital ti dialysis machine ken adda payen dagiti naipaay nga automatic bed para iti Intensive Care Unit ti ospital.
Segun ken ni Balbag, adda metten ti inpaay ti Department of Health a baro a kagamitan iti Piddig District Hospital kas iti 2-D echo wenno 2-D (two-dimensional) echocardiography, ultra sound machine, Dr. light ken Intensive Care Unit bed.
Kabayatanna, kunana a dagiti naipaay a baro a kagamitan iti Dingras District Hospital ket cardiac monitor, ECG machine, appendectomy set, LED OR light ken delivery light iti delivery room, electrolyte analyzer machine, ken Dental unit machine idinto nga iti Dona Josefa Edralin Marcos District Hospital ket adda met dagiti inpaay ti Department of Health a baro nga ECG machine, ventilator, anesthesia machine, LED Dr light ken blood bank refrigerator.
Innayonna a mangnamnama ti gobernador a babaen kadagiti nasao a kagamitan ket ad-adda pay a mapasantak ken mapasayaat ti salun-at dagiti umili.
