LAOAG CITY – Inbatad ni Barangay Kagawad Eusebio Rarangol iti Barangay 9 iti ili ti Sarrat a maladingitan da unay gapu ta adda manen ti nairekord a kaso ti covid-19 iti barangay da.
Daytoy ket ni IN-C55 a maysa nga agtawen ti uppat nga ubing a babai a ti ama na ket ni IN-C45.
Inbaga ti barangay kagawad nga awan ti ammo da a nakapulpulapol ti ubing ken uray ti ina na gapu ta saan da a rumrumuar iti balay da.
Mainaig iti daytoy, inpakaammo ni Rarangol nga ita nga aldaw ket adda dagiti napan a kameng ti Department of Health (DOH) nga inbaon ti gobierno probinsyal para iti pannakaisayangkat ti random swab test iti barangay da.
Kabayatanna, ginundawayan metten ti barangay kagawad ti nangilawlawag mainaig iti saan da a panangawat ti ubing idi saan pay a nakumpirmaran a positibo ti sakit.
Inlawlawag na nga idi naideklara a positibo ti covid-19 ni IN-C45 ket saan a dagus a napan naala ti asawa ken anak na tapno maeksamen.
Nupay kasta, idi nakarikna ti babai ti sumagmamano a sintomas ti covid-19 ket intawag a dagus ti kapitan iti nasao a barangay iti Rural Health Unit (RHU) kasta met ken ni Mayor Remigio Medrano .
Inbaga na nga iti panagturong dagiti kameng ti pulisya ken ambulansya iti barangay da ket nagsarita ti kapitan ken ni Mayor Medrano no sadinno nga inbilin ti mayor nga alaen da pay laeng ti ubing gapu ta maipan ti ina na iti ospital.
Inadmitir ni Rarangol a saan da nga inawat ti ubing gapu ta saan pay a naswab test kangrunaan na ket immunan a nagpositibo ti virus ti ama na.
Patien ni Rarangol nga adda ti pagsayaatan na ti saan da a panangawat ti ubing ken napilitan a simmurot iti ina na ken karaman a naeksamen.
Inpakaammo na a no inawat da ti ubing ken saan a naeksamen ket amangan no kimmaro ti sakit na.
