LAOAG CITY – Pinadayawan ti Department of Health (DOH) dagiti nagduduma nga indibidual a nakipagpaset ti National Blood Donation Month ditoy siudad ti Laoag.
Inpakaammo ni Dr. Gail Domecq Tanawit, ti kameng ti Department of Health (DOH) a napateg ti panangipaayda ti dara gapu ta makatulong daytoy a mangsalbar ti biag ti padada nga indibidual.
Inadmitirna nga agkasapulanda unay ti dara kangrunaan na ita nga agado manen ti kaso ti dengue isu ti gapuna nga adda ti panagbaba ti suplay ti dara.
Kunana a no agkurangda ket agturongda pay laeng iti kabangibang nga ili tapno agkiddaw ti kanayon a suplay ti dara.
Mainaig iti daytoy, ti maysa a napadayawan ket ni Mr. Ruan Bonilla, empleado ti Local Government Unit (LGU) San Nicols a nakaipaay ti pakabuklan a 31 bags ti dara manipud pay laeng idi mangrugi nga agtrabaho daytoy iti Municipal Hall iti nasao nga ili.
Inburyna a maragsakan daytoy gapu ta malaksid ti panangtulong na ti padana a tao ket malag-anan pay daytoy no kasta nga agidonar ti dara.
Gapu iti daytoy, gutgutigoten ni Mr. Bonilla dagiti kailian nga agidonar met ti dara gapu ta dakkel a tulong daytoy iti panangsakbar iti biag ti maysa a tao.
Malaksid iti daytoy, inbatad met ni Dr. Tanawit a daytoy a pammadayaw ket inatendaran dagiti nagduduma nga ahensia ti gobierno, pakairamanan payen dagiti nagduduma a Mayor manipud iti kabangibang nga ili.
Kabayatanna, gutgutigoten na amin nga umili a makipagpaset iti panagidonar ti dara gapu ta dakkel a tulong ti maipaayna daytoy. Kunana a napintas daytoy iti bagi no sadinno a mabalin ti agidonar mamin-uppat ti maysa a tawen.
