LAOAG CITY – Nag-deploy ti Department of Health (DOH) ti maysa nga specialized medical team tapno tumulong kadagiti naapektaran ti magnitude 7.8 a gingined iti Sarangani.
Inbatad ni Department of Health Undersecretary Albert Domingo a simmangpet iti Glan, Sarangani ti Philippine Emergency Medical Assistance Team (PEMAT) tapno papigsaen ti emergency response operations iti lugar.
Intugot ti grupo ti maysa a portable ken gravity-powered ultrafiltration unit a kabaelan a makaipaay ti rinibribu a litro ti nadalus ken natalged a mainum a danum iti kada aldaw uray awan ti kuryente wenno kemikal.
Nangitugotda pay dagiti agas pakairamanan dagiti panglaban kontra iti diarrhea.
Bukbuklen ti Philippine Emergency Medical Assistance Team ti dua a surgeon, dua nga obstetrician-gynecologist, dua nga emergency medicine specialist, dua nga anesthesiologist, dua a pediatrician, maysa nga internist, 17 a nurse, dua a midwife, dua a radiation technologist, maysa a medical technologist, maysa a physical therapist ken maysa a mental health specialist.
