LAOAG CITY – Kiddawen ti Department of Justice ti tulong ti National Bureau of Investigation para iti panangarisit ti Deoxyribonucleic acid wenno DNA samples iti pakabigbigan dagiti bangkay dagiti mapukpukaw a mammallot.
Inbatad ni Department of Justice Secretary Crispin Remulla a napateg a matulungan isuda ti National Bureau of Investigation tapno ipaay ti evaluation-da.
Naammoan a sipod nangrugi ti panangbiruk iti Taal lake idi Hulio 10 ket adda ti sumagmamano a sako a naglaon ti maipagarup a tultulang ti narekobre ti Philippine Coast Guard.
Naipaiman iti Philippine National Police dagiti samples para iti Deoxyribonucleic acid testing ken cross-matching.
Inlawlawag ni Remulla a ti pannakipagpaset dagiti sumagmamano nga eksperto kas ti National Bureau of Investigation ket addaan ti dakkel a tulong para iti panangresolbar ti kaso.
