LAOAG CITY – Awan pay ti pormal a naawat a komunikasion ti Department of Justice (DOJ) mainaig iti maipagarup a pannakaarestar ken ni dati a Presidential Spokesperson Harry Roque.
Daytoy ket kalpasan a rimmuar dagiti sumagmamano a damag a maipagarup a natiliwen ni Roque ken agdama nga adda iti maysa nga eropuerto idiay The Netherlands.
Inbatad ni Department of Justice Spokesperson Atty. Polo Martinez, insigida a mangipaayda ti update apaman a makumpirmaran daytoy kadakuada.
Maipalagip nga inbilin ti Pasig City Regional Trial Court ti panangkanselar ti pasaporte ni Roque, Cassandra Ong ken dadduma pay nga aglemlemmeng a kinasoan ti human trafficking gapu iti na-raid a Philippine Offshore Gaming Operators (POGO) a Lucky South 99.
Kuna ti Justice Department a kumkumpirmarenda pay laeng ti situasion ti asylum request ni Roque.
Immunan nga inrakurak ni Roque nga umapelada iti korte nangruna ket agkidkiddaw daytoy ti asylum idiay The Netherlands gapu iti maipagarup a mapaspasaran a political persecution ditoy Pilipinas.
