LAOAG CITY – Im-imbestigaran ti Department of Justice (DOJ) ti naipadamag a P1 bilyon a suhol a maipagarup nga indiaya ken ni dati a Bamban, Tarlac Mayor Alice Guo iti maysa a negosiante a Filipino-Chinese tapno matulungan isuna kadagiti legal a problema a pakairamramanna ditoy pagilian kas maibasar ken ni Secretary Jesus Crispin Remulla.
Adda ti pakainaiganna iti panangibutaktak ni dati a Senador Panfilo Lacson a ti pagayamna nga addaan ti kontak iti First Family ket maipagarup nga inasitganna ni Guo sakbay pay a rimmuar iti pagilian.
Mamati ni Remulla a saan nga ordinario no diket maysa nga “extremely talented” ni Guo iti panangibagana nga “Her game runs deep. Her game is very sophisticated.”
Kunana a posible nga adda ti binilyon a piso ti maus-usar tapno maisalakan ni Guo kadagiti kasona.
Maipalagip nga idi Biernes, inaprobaranen ti Department of Justice prosecutors ti panangilungalong iti korte ti kaso a qualified human trafficking nga inpila ti Presidential Anti-Organized Crime Commission (PAOCC) kontra ken ni Guo ken dadduma pay.
