LAOAG CITY – Inpaima ti Department of Justice iti Office of the Ombudsman dagiti sumagmamano a kaso kontra kadagiti karaman iti flood control projects anomaly.
Pormalen nga inpasa wenno in-refer ti nasao nga ahensia dagiti sumagmamano a dokumento ken impormasion a nakalap daytoy mainaig iti imbestigasion iti kontrobersia.
Indauloan mismo da Department of Justice Officer-in-charge Undersecretary Fredderick Vida ken Prosecutor General Richard Anthony Fadullon ti panangisubmitir iti daytoy ken ni Ombudsman Jesus Crispin ‘Boying’ Remulla ita nga aldaw.
Inbatad ni Prosecutor General Richard Anthony Fadullon, dagiti naipasa a kaso ket maipanggep kadagiti partikular a distrito ti Bulacan.
Kunana a lima a kaso ti insubmitirda wenno inpasada iti Office of the Ombudsman a pakairamramanan dagiti sumagmamano nga opisial ken dagiti kontratista.
Karaman kadagiti naipaima a kaso ket ti malversation iti babaen ti Article 217 ti Revised Penal Code, falsification by public officers ti Article 171, perjury ken panaglabsing iti Section 3e ti Republic Act 3019 wenno ti Anti-Graft and Corrupt Practices Act.
Inlawlawagna nga iyuray ti Department of Justice ti agbalin a pammilin ti Office of the Ombudsman no ituloy para iti pannakaipadalan iti preliminary investigation dagiti kaso.
Kuna met ni Ombdusman Remulla, dagitoy a kaso ket maibilang a low hanging cases wenno open shot cases.
Innayonna a ghost projects dagitoy gapu ta adda ti rimmuar a kuarta ngem awan ti proyekto a nakita a naaramid.
