LAOAG CITY – Inpetteng ti Department of Justice a patas iti maiwaywayat nga imbestigasion mainaig kadagiti mapukpukaw a mammallot.
Daytoy ket kagiddan ti pannakairaman dagiti sumagmamano a personalidad kas ti gaming business business tycoon a ni Charlie ‘Atong’ Ang.
Inpasigurado ni Justice Secretary Jesus Crispin Remulla a patas ken awan ti kankanununganda iti panangimbestigarda.
Inlawlawagna a dumalan iti due process dagiti reklamo nga inpila dagiti kabagian dagiti mapukpukaw a mammallot iti opisinada.
Maipalagip a pormal a nangipila dagitoy ti reklamo a murder ken serious illegal detention kontra kadagiti respondents a ni Charlie ‘Atong’ Ang pakairamanan dagiti sumagmamano a kakaduana.
Inbatad ni Remulla a saan nga alisto ti pannakaiproseso kadagiti reklamo a naipila iti opisina ti Department of Justice.
Innayonna a dumalan pay daytoy iti evaluation wenno naiget a pannakatingiting gapu ta adda dagiti kasapulan pay a dadduma a detalye maipanggep iti reklamo.
